Віцяблянкі гатовыя далучыцца да галадоўкі “Матчынага Руху 328”.

 Віцебская вясна 

 

Актывісткі “Матчынага Руху 328” зь Віцебску

Віцебскія маці асуджаных па артыкуле 328 КК РБ (Незаконны абарот наркатычных рэчываў) гатовыя далучыцца да галадоўкі, якую 27 красавіка абвесьцілі ўдзельнікі “Матчынага Руху 328”. Агулам па краіне – у вёсцы Востраў Пухавіцкага раёну, у Калінкавічах і Магілёве – галадае ўжо каля 30 жанчын.

Асноўнае патрабаваньне, якое высунулі галадоўнікі, – сустрэча з Аляксандрам Лукашэнкам.

У той самы дзень, калі была абвешчаная галадоўка, актывістак руху запрасілі на сустрэчу з кіраўніцай Адміністрацыі прэзыдэнта Натальляй Качанавай. Але галадоўніцы патрабуюць, каб на сустрэчы, якая прызначаная на 2 траўня, прысутнічалі таксама міністар унутраных справаў, кіраўнік Сьледчага камітэту, старшыня Вярхоўнага суду, генпракурор ды іншыя. Маці мяркуюць, што сустрэча з адной Качанавай ня будзе мець ніякай карысьці.

Віцебскія маці: Галадоўка можа пашырыцца на ўсю Беларусь

Тры прадстаўніцы “Матчынага Руху 328” зь Віцебску наведалі 28 красавіка галадоўнікаў у Пухавіцкім раёне і ў знак салідарнасьці на суткі адмовіліся ад ежы. Маці кажуць, што гэта толькі пачатак.

“Мы чакаем і настроены вельмі сур’ёзна. Чакаем, каб улада нас пачула. Так, патрабаваньні галадоўнікаў мы цалкам падтрымліваем. Галоўнае – сустрэча з прэзыдэнтам. А пакуль чакаем на меркаваную сустрэчу 2 траўня. Калі яна не адбудзецца ці пройдзе ня ў тым фармаце, які мы патрабуем, Віцебск таксама далучыцца да галадоўкі і акцыя пашырыцца на ўсю Беларусь”, – гаворыць каардынатарка руху па Віцебскай вобласьці Натальля Шарыпа.

“Лічу, што маці асуджаных на вялікія тэрміны па артыкуле 328 робяць усё слушна. Іншага выхаду ў нас няма, таму і пайшлі на такія скрайнія захады. Калі ў Віцебску пачнецца галадоўка – далучуся абавязкова. Будзем чакаць, надзея памірае апошняй. Я веру, што мы пераможам”, – кажа яшчэ адна ўдзельніца “Матчынага Руху 328” зь Віцебску Вольга Лявонцьева. Яе сын быў асуджаны па згаданым артыкуле на 10,5 гадоў.

Маці расказалі таксама, што становішча ў лягеры галадоўнікаў у Пухавіцкім раёне “амаль што баявое”. Над месцам, дзе праводзіцца акцыя, увесь дзень 28 красавіка лётаў дрон, а пасьля яго ў небе зьявіўся вайсковы верталёт. Удзельніцы галадоўкі мяркуюць, што гэтыя палёты невыпадковыя.

Чаго патрабуюць галадоўніцы

  • Сустрэча з Аляксандрам Лукашэнкам.
  • Стварэньне камісіі аб пераглядзе спраў паводле крымінальнага артыкула 328 пачынаючы з 2013 году.
  • Зьмена заканадаўства адносна артыкула 328 Крымінальнага кодэксу.
  • Амністыя асуджаных паводле артыкула 328.

Адмовілі ў правядзеньні пікета ў Віцебску

Нагадаем, што ў Віцебску працягваецца кампанія па зборы подпісаў за рэфармаваньне судовай сыстэмы і ўнясеньне зьменаў у арт. 328 КК РБ.

У межах кампаніі маці асуджаных наведваюць дэпутатаў, прадстаўнікоў выканаўчай улады і рыхтуюцца да круглага стала, які мае адбыцца ў траўні. Магчыма, акрамя ўладаў і прадстаўнікоў “Матчынага Руху”, удзел у ім возьме дэпутатка Палаты прадстаўнікоў Ганна Канапацкая.

Каардынатарка руху Натальля Шарыпа расказала таксама, што ўлады адмовілі ёй у правядзеньні з 21 да 25 красавіка пікетаваньня каля піраміды ў Віцебску, якое яна хацела зладзіць у мэтах збору подпісаў і вывучэньня грамадзкага меркаваньня. Прычыны адмовы – няправільна выбранае месца для пікету і адсутнасьць дамоваў з арганізацыямі, якія павінны абслугоўваць масавае мерапрыемства (міліцыя, мэдыкі, ЖКГ).

Ціск на актывістку?..

Натальля Шарыпа паведаміла, што ад пачатку кампаніі (з 13 сакавіка) яе сын, які адбывае 14-гадовы тэрмін у папраўчай калёніі №2, ужо 37 сутак правёў у штрафным ізалятары (за парушэньні формы адзеньня і распарадку дня). Хаця за два гады, які правёў у зьняволеньні, ніводнага разу да гэтага ў ШІЗА не трапляў.

Маці мяркуе, што гэта можа быць ціскам на яе як актывістку “Матчынага Руху 328”.

Зьміцер Міраш

 

 

Рекомендуем прочитать

Отправить ответ

avatar
7777
  Подписаться  
Уведомить

Подписаться на уведомления об обновлениях на сайте в Telegram  
Не забудьте в открывшемся окошке внизу нажать "присоединиться".